Suid-Afrika se biome

      Die sukkulente-karoobioom

• Die sukkulente-bioom, insluitend die woestyn, strek oor 7.5% van die land (ongeveer 83 000 km²).
• Hierdie bioom strek oor die dor westelike dele van Suid-Afrika, wat Namakwaland en die Richtersveld insluit.
• Die streek is uitermatig droog in die somer en die temperatuur styg dikwels tot hoër as 40^oC. Dit reën in die winter en die reënval wissel van 20 mm tot 290 mm per jaar.
• In vergelyking met die streke van dieselfde grootte het die sukkulente-karoobioom die grootste aantal vetplante in die wêreld. Die meeste van hierdie plante het sukkulente blare waarvan heelwat baie klein is, soos die klipplante (met volksname soos klipuintjies of toontjies).
• Die plante in die sukkulente-bioom is aangepas vir die uiters droë somers en kan dus oorleef. Sukkulente plante soos klein vygies en crassulas of klipblomme (vetplante met volksname soos heuningbos en keiserskroon), sowel as die groot kokerboom, stoor water in hul blare en/of stamme. Die bas van sommige bome is wit en dit laat die hitte weerkaats. Eenjarige madeliefies en geofiete is dormant in die somer en groei en blom dan na die winterreën.
• Die wilde diere hier is meestal klein, bv. die bakoorjakkals, meerkat en blafgeitjie. Daar is ook voëls en ongewerwelde diere. Baie van hulle is nagdiere en kruip bedags in tonnels onder die grond weg om die warm, droë toestande te vermy.
• Die jaarlikse skouspel van lenteblomme het groot dele van die sukkulente-karoo bekend gemaak. Blommetoerisme is ‘n belangrike bron van inkomste vir die streek. In die Klein Karoo word daar met volstruise geboer.
• Die Succulent Karoo Ecosystem Programme (Sukkulente-karoo Ekosisteemprogram), (SKEP) is ontwikkel om hierdie streek te bewaar. Vir meer inligting, besoek www.skep.org.