Suid-Afrika se biome (terug na Bioomkaart)

      Die fynbosbioom

Die fynbosbioom strek oor slegs ongeveer 6.7% (85 000 km²) van Suid-Afrika, maar bevat die meeste plantspesies in die land (ongeveer 7500).

Die grootste deel van die fynbosbioom word langs die kus en in die Kaapse Plooiberge tussen Nieuwoudtville in die noordweste en Port Elizabeth in die ooste aangetref. Die grootste deel van hierdie streek het koue, nat winters en warm, droë somers. Fynbosplantegroei is vlambaar en daar moet met tussenposes brande wees sodat dit kan regenereer. Die fynbosbioom sluit fynbos- sowel as renosterveldplantegroei in. Fynbos is geneig om in arm grond te groei en is baie ryk aan plantspesies. Renosterveld groei in vrugbaarder grond en kan meer diere onderhou.

Fynbosplante sluit proteas, erikas en restio’s in, asook baie ander groepe plante soos geofiete , madeliefies, peulplante en vygies. Baie van die plante is struikgewasse met klein, harde blaartjies. Daar is baie min bome of gras in fynbos. Diere sluit klein bokkies in soos die grysbok, steenbok en bontebok, die luiperd, Kaapse bobbejaan, ystervark en ook skilpaaie en voëls wat nektar drink en saad vreet.

Baie mense word in hierdie bioom in diens geneem om fynbosplante te oes. Dit sluit in: veldblomme, boegoe vir medisyne en as geurmiddel, restio’s vir dakwerk, asook rooibos vir tee. Die grootste gedeelte van renosterveld is bewerk vir die aanplant van gewasse en bome, bv. koring, druiwe en olywe, wat in ‘n Mediterreense klimaat aard.

Vir meer inligting oor hoe die fynbosbioom bewaar word, besoek die webwerf van die C.A.P.E. -program.