Suid-Afrika se biome

      Die woudbioom

• Die woudbioom is die kleinste bioom in Suid-Afrika en strek oor slegs ongeveer 0.1% van die land (1 062 km²).
• Woude strek vanaf seevlak tot hoër as 2000 meter en kom voor in gebiede waar dit baie reën en waar dit nie ryp nie. In woude is dit nat en klam en brande kom selde voor.
• Woude bestaan uit bome wat ‘n digte blaardak vorm, met verskeie lae van plante onder die blaardak.
• Die grootste en bekendste woude in Suid-Afrika is die Knysna- en Tsitsikammawoud van die Suid-Kaap.
• Die meeste ander woude is baie klein en geïsoleerd. Hulle sluit duinwoude in KwaZulu-Natal en bergwoude (bv. teen die hellings van Tafelberg en die Drakensberge) in.
• Woudplante sluit die volgende in: geelhout-, stinkhout- en ysterhoutbome; rankplante en epifiete , sowel as mosplante en varings.
• Diere sluit bosvarke, bosbokke, ape, Knysna-loeries, duiwe en arende in.
• Tussen 1800 en 2000 is ongeveer 40% van Suid-Afrika se woude vernietig. Bome is afgekap vir hout en kuswoude is vernietig om plek te maak vir suikerrietplantasies.
• Deesdae is baie inheemse woude deur plantasies indringerbome (bv. dennebome) vervang. Die uitkap van inheemse bome in woude word streng beheer.